Monday, July 14, 2008

التاج

طبعا فالبدايه....بشكر كل الشكر
احمد سمير
حبيب قلبى ..بجد هوه من الناس القليله اللى حبيتها اوى.......لقيته معايا اخ وصاحب وحبيب وابويه ساعات بس مش كتير...المهم نتكلم بقى عن العشر حاجات اللى عنى يمكن عشان تعرفونى
اولا...انا مجدى عبد الغنى ابراهيم جمعه...طالب بصيدله طنطا اللى انا اتشرف بكونى احد من ابنائها وكون احد خريجينها...وكفايه عشان اتعرفت فيها على ناس بجد ربنا يحميهم.......ويخليهم معايا ونخاف على بعض علطول
ثانيا...انا انسان تحكمنى الكثير من القيود..يمكن عشان التربيه ويمكن عشان انا اخر اخواتى ف شارب من كل اخ ليا واخد من شخصيته حته فانا بقيت كوكتيل من اخواتى...الى جانب انى ضيفت على نفسى حاجات تبقى بتاعتى انا...برضوا عامل التربيه دا حاجه اساسيه
ثالثا...الثقه اللى وضعها ابويه فيا....ملهاش حدود...ساعات اجى عشان اساله ف حاجه يقولى فكر فيها واختار انتا...يعنى بيرمى الحمل عليا عشان عارف انى فيوم هبقى مسئول عن اسره واللى يارب يكون الاسره دى على خير...اقدر امشيها كويس...وابويه راجل مكافح...هوه حاليا على المعاش...وكان موظف بشركه مصر للغزل والنسيج...الى جانب كدا هوه كان يطلع من الشغل عشان يحسن راتبه المعقول وعشان يمارس المهنه اللى اتعلمها من صغره وهيه الحياكه.....ابويه ترزى بعد الشغل...يعد بقى يفصل بناطيل وقمصان وكده......راجل مكافح بجد ومها قلت فيه مش هكفى....ويكفى انه قدر يطلع 2 دكاتره ونا واحد منهم و اتنين اساتذه ف التعليم
رابعا...امى بقى...ست الكل...مينفعش اتكلم عن مجدى من غير اتكلم عن ماما...اجمل حاجه ف امى انها واقفه جنبى وتثبتنى ف حكايه الغنا اللى انا واخده وبتشجعنى على طول وبسمعها الاغنيه اللى هغنيها وتقولى رايها بحسها الجميل وتقولى ..خد بالك من الحته دى ...انتا كويس هنا وكده
خامسا...انا بقى..انا انسان حاسس انى قيادى حبتين..حساس اوى ...بحب بسرعه...وصعب انى اكره....بس عندى حكايه العصبيه دى مشكله...يعنى نرفزه...ببقى متنرفز بسرعه اوى..بس بعدى بسرعه برضوا وادينى بحاول اعدى النقطه دى
سادسا.....صحابى...اللى تاعبينى دايما...حبيهم ومقدرش ازعل حد فيهم...بفرح اوى نا معاهم...يعنى افتكر اخر يوم اما كنت عند سمير وكان اجمل حاجه ف اليوم انى اكلت محشى عند سمير وخرجنا بعدها قابلنا زياد....واتمشينا ف طنطا
سابعا وثامنا اللى الاخر ....فانا اعتقد انى جوابت على كله....من خلال اللى فات
امرر التاج بعدى لزياد......بس بصراحه مش فاكر البلوج بتاعه...بس هقوله ان شاء الله

No comments: